दुईवटा मोटरसाइकल एकापसमा ठोक्किदाँ पर्सामा एक जनाको ज्यान गएको छ । भने ४ जना घाइते भएका छन् । मृत्यु हुनेमा वीरगञ्ज महानगरपालिका वडा नम्बर १९ केहुनियाका २२ वर्षका इरफान मियाँ रहेका छन् ।

गएराती जिल्लाको पोखरिया नगरपालिका वडा नम्बर ९ बैरियास्थित सडकखण्डमा मधेस प्रदेश ०३–०३१ प ९६७५ नम्बरको मोटरसाइकल र ना २८ प ९४४३ नम्बरको मोटरसाइकल एक आपसमा ठक्कर खाएको थियो । ना २८ प ९४४३ नम्बरको मोटरसाइकलमा सवार इरफानको मृत्यु भएको पर्सा प्रहरीका प्रवक्ता कुमार बिक्रम थापाले जानकारी दिए ।

दुर्घटनामा गम्भिर घाइते भएका उनलाई उपचारका लागि नीलकण्ठ अस्पताल वीरगञ्जतर्फ ल्याउने क्रममा बाटोमै निधन भएको प्रहरीले जनायो । दुर्घटनामा घाइते भएका मधेस प्रदेश ०३–०३१ प ९६७५ नम्बरको मोटरसाइकलमा सवार ३ जनाको नेशनल मेडिकल कलेजमा उपचार भइरहेको छ ।

उनीहरुमध्ये मोटरसाइकल चालकको अवस्था गम्भिर रहेको प्रवक्ता थापाले बताए । ना २८ प ९४४३ नम्बरको मोटरसाइकल चालकलाई भने पर्सा प्रहरीले नियन्त्रणमा लिएर घटनाबारे आवश्यक अनुसन्धान गरिरहेको जिल्ला प्रहरी कार्यालय पर्साले जनायो । उनको अवस्था सामान्य रहेको प्रहरीको भनाइ छ ।