बारा प्रहरीले प्रतिबन्धित लागू औषधसहित दुई व्यक्तिलाई पक्राउ गरेको छ। ईलाका प्रहरी कार्यालय सिमरा र लागू औषध नियन्त्रण ब्युरो शाखा कार्यालय वीरगञ्ज पर्साबाट खटिएको संयुक्त प्रहरी टोलीले जीतपुर सिमरा उप(महानगरपालिका वडा नम्बर २ सिमरा चौकमा हिडिरहेका शंकास्पद व्यक्तिहरूलाई जाँच गर्दा प्रतिबन्धित लागू औषधसहित उनीहरूलाई पक्राउ गरेको हो।

पक्राउ पर्नेमा पर्साको वीरगञ्ज महानगरपालिका वडा नम्बर ५ का ४६ वर्षीय विजय जैसवाल र छिपहरमाई गाउँपालिका वडा नम्बर ५ का ४५ वर्षीय मेघनाथ महतो रहेका छन्। प्रहरीको अनुसार, उनीहरूले पिठ्युँमा बोकेको कालो झोलामा लुकाएर राखेको प्रतिबन्धित लागू औषध भेटिएको छ।

प्रहरीले उनीहरूको साथबाट २०० पिस फेनारगन, २०० पिस लुफिन, र २०० पिस डाईजोपान बरामद गरेको छ। पक्राउ परेका दुबै जनालाई नियन्त्रणमा लिएर आवश्यक कानुनी प्रक्रिया अघि बढाइएको जिल्ला प्रहरी कार्यालय बाराका प्रवक्ता तथा प्रहरी नायब उपरीक्षक प्रकाश सापकोटाले जानकारी दिए।