जिल्ला प्रहरी कार्यालय बाराले  अवैध रूपमा ल्याइएका सामानसहित ३ वटा ट्रक नियन्त्रणमा लिएको छ । विशेष सूचनाको आधारमा प्रहरीले अवैध रुपमा भन्सार छलेर ल्याइएका सामानसहित ट्रक नियन्त्रणमा लिएको हो ।

जिल्ला प्रहरी कार्यालय बारा र ईलाका प्रहरी कार्यालय जीतपुरबाट खटिएको संयुक्त प्रहरी टोलीले वीरगञ्जबाट पथलैयातर्फ जाँदै गरेको तीनवटा ट्रकलाई रोकी चेकजाँच गर्ने क्रममा बिल बिजकभन्दा फरक सामान भेटाएको हो । 

जीतपुर सिमरा उपमहानगरपालिका वडा नम्बर ७ मा राति करिब पौने १० बजे रोकिएको ४ ख ८८७५ नम्बरको ट्रकबाट किराना सामान, नरिवल लगायत हार्डवेयरका तथा अन्य खुद्रा समानहरू बराम गरिएको बाराका प्रवक्ता प्रहरी नायब उपरीक्षक प्रकाश सापकोटाले जानकारी दिए । उनकाअनुसार बरामद गरिएको अन्दाजी ३३ लाख ३२ हजार २ सय २६ रुपैयाँ बराबरको सामानसहित ट्रक नियन्त्रणमा लिइएको हो । 
त्यसैगरी, राति करिब साढे ११ बजे वीरगञ्जबाट पथलैया तर्फ जाँदै गरेको ना ७ ख ५९२६ नम्बरको डिब्बा ट्रकमा लोड गरिएको सामान पनि प्रहरीले नियन्त्रणमा लिएको छ । लेडिज सुट, ग्लास प्रेम समिती, वाटरप्रुफ ग्लु लगायतका सामाग्री बरामद गरिएको प्रहरी नायब उपरीक्षक सापकोटाले बताए । बरामद सामग्रीलाई करिब २८ लाख ९५ हजार ७१३ रुपैयाँ मूल्यांकन गरिएको छ । 

यस्तै राति नै करिब ११ बजेर ५० मिनेटमा बाराको जितपुर सिमरा उपमहानगरपालिका वडा नम्बर १ पथलैया चौकबाट प्रहरीले अर्को ट्रक नियन्त्रणमा लिएको छ । वीरगञ्जबाट काठमाण्डौतर्फ जाँदै गरेको ना ३ ख ७३४२ नम्बरको डिब्बा ट्रकमा लोड गरिएको कपडा, ग्लास, फोटो पिक्चर, लेडिज सुट, रिबन, पूजा सामग्री लगायतका खुद्रा तथा किराना सामान बरामद गरिएको सापकोटाले जानकारी दिए ।  उक्त ट्रकबाट करिब ६६ लाख ९० हजार १३१ रुपैयाँ बराबरको सामान फेला परेको छ । 

तीन वटै ट्रकबाट बरामद भएको करिब एक करोड २९ लाख रुपैयाँ बराबरको सामान र ट्रकलाई आवश्यक कारवाहीका लागि आन्तरिक राजस्व कार्यालय पथलैया बारामा बुझाइएको प्रहरी नायब उपरीक्षक सापकोटाले जानकारी दिए ।