जिल्ला प्रहरी कार्यालय पर्साले बरामद गरेको भन्सार छलीका लत्ताकपडा तथा खद्यान्न मालवस्तुहरु कारबाहीका लागि भन्सार कार्यालय बुझाएको छ ।

जिल्लाको विभिन्न ठाउँबाट प्रहरीले बरामद गरेको भन्सार छलीका १२ लाख भन्दा बढीका सामानहरु आइतबार अबेर कारबाहीका लागि बीरगन्ज भन्सार कार्यालयमा बुझाएको हो । प्रहरीले गरेको जाँचको क्रममा बीरगन्जको विभिन्न ठाउँबाट १२ लाख ३ हजार मूल्य बराबरको लत्ताकपडा तथा खद्यान्न मालवस्तुहरु बरामद गरेको थियो ।
भन्सार पास गरेको कागजात फेला नपरेपछि पर्सा प्रहरीले थप कारबाहीका लागि भन्सार कार्यालय पठाएको प्रहरी प्रवक्ता दीपक भारतीले बताए । प्रहरीको विशेष टोलीले भन्सार छलीका सामान बरामद गरेको थियो ।