वीरगञ्ज, २३ पुष । वीरगञ्जकै स्थानीय कलाकारहरुले निर्माण गरेको हिन्दी चलचित्र ‘द रघु’ को ट्रेलर सार्वजनीक भएको छ । ‘द जुम आउट’ प्रोडक्शन हाउसद्वारा निर्मित हिन्दी चलचित्र ‘द रघु’ को ट्रेलर शनिवार साँझ ५ बजे ‘जुम आउट’ को आफ्नै युट्युब च्यानलमार्फत सार्वजनीक गरिएको हो ।
ट्रेलरमा देखाइएअनुसार यो फिल्म कुनै हत्याराको खोजीमा प्रहरीले देखाएको तदारुकता र सक्रियतासँगै सामाजिक कथा वस्तुमा आधारित भएको अनुमान लगाउन सकिन्छ । कथामा वीरगञ्जसँगै सिंगो समाजको रहनसहन, संस्कृती एम् आम जनताको दैनिकीलाई चित्रण गर्ने प्रयास गरिएको चलचित्रका व्यवस्थापक राजा गुप्ताले बताए ।
सुजित पटेलले निर्देशन गरेको यस चलचित्रमा प्रितम कलवार, सुनिल पण्डित, ओम आर्य, प्रकाश शर्मा, अजमत अली अंसारी, कामेश्वर चौरसिया, दिव्य सिग्देल, मनोज गुप्ता, बृजकिशोर पटेल, मुस्कान मल्लीक, श्रवन जयसवाल, रजनीकान्त आयन अंसारी, रोशन जेहान अंसारी, कृष्ण पटेल, आदित्य पटेल लगायतले अभिनय गरेका छन् ।
कृष्ण दास तत्वा निर्माता रहेको यस फिल्ममा अजमत अली अंसारीले गायन तथा संगीत भरेका छन् भने लिलावती लालचन्द जयसवालले कथा लेखेका हुन् । सुवास देवकोटाले ईडिट गरेको फिल्मको सहनिर्देशन आदित्य पटेलले गरेका छन् ।
