हिन्दू धर्मावलम्बीहरूको दोस्रो ठूलो पर्व, आजदेखि विधिवत् रूपमा सुरु भएको छ। बिहान ११ः०१ बजेपछि कार्तिक कृष्ण त्रयोदशी तिथि लागेकाले धनतेरस पर्व आज मनाइँदैछ। नेपाल पञ्चाङ्ग निर्णायक विकास समितिका अनुसार भोलि बुधबार यमदीपदान र काग तिहार मनाइनेछ। शास्त्रअनुसार सायंकालको त्रयोदशीमा यमदीपदान सुरु गर्नुपर्ने र सूर्योदयको त्रयोदशीमा काग तिहार मनाउनुपर्ने मान्यता रहेको छ।

यस वर्ष कुकुर तिहार र लक्ष्मीपूजा कात्तिक १५ गते बिहीबार परेको छ। यस दिन बिहान नरक स्नान गर्ने परम्परा छ। लक्ष्मीपूजा चतुर्दशी र औँसी तिथिमा गरिन्छ, जुन बिहीबार मनाइँदैछ। गाईपूजा, गोवर्द्धन पूजा, र आत्म पूजा शनिबार कात्तिक १७ गते मनाइन्छ, जसका साथ नेपाल संवत् ११४५ पनि सुरु हुनेछ। भाइटीकाको साइत आइतबार बिहान ११ः३७ बजे रहेको छ।

झिलीमिली पर्वका रूपमा परिचित तिहारमा राजधानी लगायत सहरहरूमा एक हप्ता अघिदेखि नै दीपावलीको सजावट देख्न सकिन्छ। साथै, प्रहरीले पटाका नपड्काई सभ्य रूपमा पर्व मनाउन आह्वान गरेको छ।