सहकारी ठगी प्रकरणमा पक्राउ परेका राष्ट्रिय स्वतन्त्र पार्टीका सभापति रवि लामिछानेलाई थप १५ दिन हिरासतमा राख्न अदालतले अनुमति दिएको छ ।

सहकारी ठगी, सङ्गठित अपराध तथा सम्पत्ति शुद्धीकरणको मुद्दामा अनुसन्धामा रहेका पूर्व गृहमन्त्री रवि लामिछानेसहित चारैजनालाई जिल्ला अदालत कास्कीले थप १५ दिन हिरासतमा राख्न अनुमति दिएको हो ।

रविसँगै उनका साझेदार एवम् पूर्वडीआईजी छविलाल जोशी, लीला पछाई र व्यवसायी रामबहादुर खनाललाई पनि थप १५ दिन हिरासतमा राखेर अनुसन्धानको अनुमति मिलेको श्रेस्तेदार राजन खनालले खबरहबलाई बताए ।

जिल्ला प्रहरी कार्यालय कास्कीको हिरासतमा रहेका चारै जनालाई म्याद थपका लागि कास्की जिल्ला अदालतमा उपस्थित गराइएको थियो । उनीहरूलाई आइतबार बिहान १० बजे अदालत लगिएको थियो ।

गत कात्तिक २ गते शुक्रबार काठमाडौंको चमतीस्थित पार्टी कार्यालयबाटै पक्राउ परेका लामिछाने कात्तिक ३ यता कास्की प्रहरीको हिरासतमा छन् ।

कास्की जिल्ला अदालतले उनलाई कात्तिक ४ मा ६ दिन, कात्तिक ८ मा ७ दिन, कात्तिक २० मा १० दिन र कात्तिक २५ मा १३ दिन म्याद थप गरेर अनुसन्धानको अनुमति प्रहरीलाई दिइसकेको छ ।

रविलाई कास्की हिरासतमै हुँदा कात्तिक २६ गते रुपन्देही लगेर त्यहाँस्थित सुप्रिम सहकारीको बचत हिनामिना प्रकरण बयान लिइएको थियो।

बुटवलको सुप्रिम सहकारी संस्थाको बचत हिनामिनामा प्रकरणमा उनलाई तीन दिनसम्म भैरहवामा ७० वटा प्रश्नसहित बयान गरिएको थियो।

कास्कीमा म्याद थप भएपछि अब रविलाई काठमाडौं लगिनेछ । लामिछानेलाई बयानका लागि काठमाडौं पठाउने तयारी कास्की प्रहरीले गरेको छ। काठमाडौंमा कालिमाटीस्थित स्वर्णलक्ष्मी सहकारीको बचत हिनामिनामा लामिछाने जोडिएका छन् ।