रौतहट, २३ माघ 
रौतहटको राजदेवी नगरपालिका-६ स्थित बाग्मती नदीमा सरस्वती पूजाको मूर्ति विसर्जन गर्ने क्रममा एक युवकको डुबेर ज्यान गएको छ।
मृतक २२ वर्षीय सुरज यादव राजदेवी-७ मुडवलवा निवासी हुन्। मङ्गलवार साँझ मूर्ति विसर्जनका क्रममा यादव नदीको गहिराइमा फसेर बेपत्ता भएका थिए। घटना भएपछि प्रहरी, स्थानीय युवाहरू तथा गोताखोरहरूको टोलीले खोजी कार्य सुरु गरेको थियो।
यादव बेपत्ता भएको खबर पाए लगत्तै जिल्ला प्रहरी कार्यालय रौतहट, स्थानीय बासिन्दा, र गोताखोरहरूको टोलीले व्यापक खोजी अभियान सञ्चालन गर्यो। नदीको प्रवाह तेज भएकाले खोजी कार्यमा कठिनाइ भएको थियो।
बुधवार बिहान यादवको शव डुबेकै स्थानमा फेला परेको प्रहरी नायव उपरीक्षक (डिएसपी) दीपककुमार रायले जानकारी दिए। शव पानीमुनि अड्किएको अवस्थामा भेटिएपछि स्थानीयले माछा मार्ने जालको सहायताले बाहिर निकालेका थिए। प्रहरीका अनुसार, आवश्यक कानुनी प्रक्रिया पूरा गरी पोस्टमार्टमपछि शव परिवारलाई बुझाइएको छ।
हरेक वर्ष मूर्ति विसर्जनका क्रममा यस्ता दुर्घटनाहरू भइरहे पनि सुरक्षाका उपायहरू प्रभावकारी रूपमा लागू गरिँदैनन्। स्थानीय प्रशासन र सुरक्षा निकायहरूले विसर्जन स्थलमा सुरक्षाकर्मी, उद्धार टोली, डुङ्गा, लाइफ ज्याकेट, र आपत्कालीन सहायता व्यवस्था गर्नुपर्ने देखिएको छ।
प्रहरीका अनुसार, नदी किनारमा आवश्यक सावधानी नअपनाउँदा यस्ता घटनाहरू दोहोरिने गरेका छन्। मूर्ति विसर्जनका लागि सुरक्षित स्थान तोक्ने, पानीको गहिराइ र बहावको जानकारी लिने, तथा जोखिमयुक्त स्थानमा नजाने उपायहरू अपनाउनुपर्ने स्थानीय प्रशासनले आग्रह गरेको छ ।
सुरज यादवको असामयिक निधनले परिवार शोकमा डुबेको छ। गाउँलेहरूले पनि उनको मृत्युप्रति गहिरो दुःख व्यक्त गरेका छन्। स्थानिय प्रशासनले भविष्यमा यस्ता दुर्घटना हुन नदिन थप सुरक्षाका उपायहरू अपनाउने प्रतिबद्धता जनाएको छ।