वीरगञ्ज, २४ माघ 
जिल्ला प्रहरी कार्यालय, पर्साले सानो पाइला बचत तथा ऋण सहकारी संस्था लिमिटेडको ठगी प्रकरणमा रवि लामिछानेसहित ३५ जनाविरुद्ध अभियोग पत्र दर्ता गर्ने तयारी गरेको छ। सहकारीका करिब ४,८०० सदस्यहरूले आफ्नो बचत फिर्ता नपाएको भन्दै उजुरी दिएका थिए, जसपछि प्रहरी अनुसन्धान अघि बढाएको हो।

चितवनमा लामिछानेविरुद्ध उजुरी दर्ता भइसकेको छ, र त्यहाँको कानुनी प्रक्रिया पूरा भएपछि पर्सा प्रहरीले जिल्ला न्यायाधिवक्ताको कार्यालयमा अभियोग पत्र दर्ता गर्ने जनाएको छ। केन्द्रीय अनुसन्धान ब्युरो (सीआईबी) को टोलीले समेत पर्सा जिल्ला प्रहरी कार्यालयमा आएर सहकारीसम्बन्धी उजुरीको अध्ययन गरिरहेको छ।

यसअघि वीरगञ्ज महानगरपालिका र मनीषकुमार सिस्काले पर्सा जिल्ला अदालतमा सानो पाइला सहकारीविरुद्ध दुई वटा मुद्दा दर्ता गरिसकेका थिए, तर ती अभियोग पत्रमा रवि लामिछानेको नाम उल्लेख गरिएको थिएन। तर, पूर्व डीआईजी छविलाल जोशीको घरमा भएको छापामारीमा लामिछानेसँग सम्बन्धित ठगीका प्रमाण भेटिएको दाबी प्रहरीले गरेको छ। सोही आधारमा तेस्रो अभियोग पत्रमा लामिछानेको नाम समावेश गरिने तयारी गरिएको छ।

सहकारी ठगी प्रकरणमा १७९ जनाले प्रहरीमा जाहेरी दिएका थिए, जसको आधारमा १३ जनाविरुद्ध मुद्दा दर्ता गरिएको छ। मुद्दा परेकामध्ये संस्थाकी पूर्व उपाध्यक्ष नेहा पौडेल स्वयं प्रहरीमा हाजिर भएकी थिइन् भने कर्मचारी राधेचन्द्र यादव पक्राउ परेका थिए। पर्सा जिल्ला अदालतले पौडेललाई रु १ करोड १० लाख धरौटीमा र यादवलाई रु ३५ लाख धरौटीमा रिहा गरिसकेको छ।

पर्सा प्रहरीले सानो पाइला सहकारीको २०७८ वैशाखदेखि साउनसम्मको बैंक विवरण जाँच गर्दा रकम अपचलन भएको पुष्टि गरेको छ। प्रारम्भिक अनुसन्धानमा रु २४.५ करोड अपचलनको आरोप लगाइएको थियो, तर दोस्रो र तेस्रो मुद्दामा सोही रकम बढेर करिब १ अर्ब रुपैयाँसम्म पुग्ने अनुमान गरिएको छ। प्रहरीले घटनामा संलग्न अन्य व्यक्तिहरूको खोजी तथा अनुसन्धानलाई तीव्र बनाएको छ।